महागांव (यवतमाळ लाईव्ह न्यूज): यवतमाळ जिल्ह्यातील महागांव पोलिसांनी गोवंश मांसाच्या अवैध तस्करीचा पर्दाफाश केला आहे. या कारवाईत ११० किलो गोवंश मांस जप्त करण्यात आले असून, एका आरोपीला अटक करण्यात आली आहे. महागांव पोलिस स्टेशनच्या हद्दीत ही घटना घडली असून, यामुळे परिसरात खळबळ उडाली आहे.
यवतमाळ जिल्ह्यात अवैध धंदे, शस्त्र बाळगणे, उघड अपराध करणारे आणि आरोपींचा शोध घेणे, तसेच अवैध व्यापार आणि नशेच्या पदार्थांच्या तस्करीला आळा घालण्यासाठी पोलिस अधीक्षक कुमार चिंता यांनी स्थानिक गुन्हे शाखेला सूचना दिल्या होत्या. या सूचनांनुसार, स्थानिक गुन्हे शाखेच्या पोलिस निरीक्षकांनी आपल्या टीमला गुप्त माहितीच्या आधारावर प्रभावी कारवाई करण्याचे आदेश दिले.
१४ ऑक्टोबर रोजी स्थानिक गुन्हे शाखेची टीम महागांव पोलिस स्टेशनच्या हद्दीत गस्त घालत होती. त्यावेळी त्यांना माहिती मिळाली की, पेढी गावातील शेख अकील शेख मिरांजी हा आपल्या चारचाकी वाहनातून गोवंश मांसाची तस्करी करत आहे. या माहितीवरून टीमने पेढी-पोखरी रस्त्यावर वाहन क्रमांक एमएच ०५ एजे ६५२१ थांबवून त्याची तपासणी केली.
यवतमाळमध्ये भाजपला मोठा धक्का: विजय चोरडिया यांनी घेतला शिंदे यांच्या शिवसेनेत प्रवेश
तपासणीत ११० किलो गोवंश मांस आढळून आले. या मांसाची किंमत प्रति किलो २४० रुपये प्रमाणे एकूण २६,४०० रुपये इतकी आहे. तसेच, वाहनाची किंमत एक लाख रुपये आहे. पशुवैद्यकीय अधिकाऱ्यांच्या सल्ल्यानुसार पंचनामा करून हे सर्व साहित्य जप्त करण्यात आले. शेख अकील शेख मिरांजी (वय ४३, राहणार पेढी, तालुका महागांव) याच्याविरुद्ध महागांव पोलिस स्टेशनमध्ये गुन्हा दाखल करण्यात आला आहे.
या कारवाईत यवतमाळचे पोलिस अधीक्षक कुमार चिंता, अपर पोलिस अधीक्षक अशोक थोरात, उपविभागीय पोलिस अधिकारी हनुमंत गायकवाड, पोलिस निरीक्षक सतीश चवरे आणि स्थानिक गुन्हे शाखा यवतमाळच्या अधिकाऱ्यांच्या मार्गदर्शनात एपीआय धीरज बांडे, शरद लोहकरे, संतोष भोरगे, मुन्ना आडे, तेजाब रणखांब, सुभाष जाधव, कुणाल मुंडोकार, रमेश राठोड, सुनिल पंडागले, रविंद्र श्रीरामे आणि राजेश जाधव या टीमने महत्त्वाची भूमिका बजावली.
