यवतमाळ लाईव्ह न्यूज: इलॉन मस्क यांनी त्यांच्या ‘एक्स’ प्लॅटफॉर्मवर ग्रोक एआयच्या एका नव्या अपडेटची माहिती दिली आहे. हे वैशिष्ट्य इतके रोचक आहे की, कोणत्याही फोटोला फक्त लॉंग प्रेस करून व्हिडिओमध्ये बदलता येते आणि नंतर त्यात तुम्हाला हवे तसे बदलही करू शकता. हे ग्रोकच्या वेगाने विकसित होत असलेल्या एआय टूल्सचा भाग आहे. यामुळे युजर्सना क्रिएटिव्हिटी दाखवण्याची नवीन संधी मिळत आहे. मस्क यांनी स्वत: या वैशिष्ट्याची ओळख करून देताना लिहिले की, कोणत्याही इमेजवर लॉंग प्रेस करा आणि ती व्हिडिओमध्ये बदलून टाका, मग तुम्हाला जे हवे ते कस्टमाइझ करा. हे अपडेट येताच सोशल मीडियावर धुमाकूळ घालू लागले. अनेक युजर्सनी लगेचच हे ट्राय केले आणि त्यांनी तयार केलेले मजेदार व्हिडिओ शेअर करायला सुरुवात केली. कोणी एखाद्या व्यक्तीच्या फोटोला कार्टूनमध्ये बदलले, तर कोणी इमेजमध्ये अॅनिमेशन जोडून मजा आणली. मस्क यांनीही एक उदाहरण देत पोस्ट केले, ज्यात ते म्हणतात, ‘अॅड अ बॉयफ्रेंड अँड दे ट्रांझिशन इंटू मपेट्स.’ यामुळे ग्रोकचे हे वैशिष्ट्य सोशल मीडियावर ट्रेंड होऊ लागले आणि लोक त्याबद्दल चर्चा करू लागले.
ग्रोक हे इलॉन मस्क यांच्या एक्सएआय कंपनीचे प्रमुख टूल आहे. कंपनीने जुलै महिन्यात ग्रोक ४ लाँच केले आणि ऑगस्टपासून ते सर्व युजर्ससाठी मोफत उपलब्ध करून दिले. अर्थात, मोफत व्हर्जनमध्ये दैनंदिन प्रश्नांची मर्यादा आहे आणि प्रतिसाद थोडा संथ येतो, पण सशुल्क युजर्सना सुपरग्रोक मोड आणि जलद आउटपुटचा फायदा मिळतो. अलीकडेच मस्क यांनी सांगितले की, त्यांचे पुढचे मॉडेल ग्रोक ५ आर्टिफिशिअल जनरल इंटेलिजन्सच्या १० टक्के पातळीवर पोहोचले आहे आणि हा आकडा सतत वाढतच आहे. हे वैशिष्ट्य ग्रोकच्या एकूण क्षमतेचा विस्तार दाखवते, ज्यात एआयच्या मदतीने क्रिएटिव्ह कंटेंट तयार करणे सोपे होते.
दरम्यान, इलॉन मस्क आणि ओपनएआयचे सीईओ सॅम ऑल्टमन यांच्यातील वाद पुन्हा एकदा उफाळून आला आहे. मायक्रोसॉफ्टचे सीईओ सत्या नाडेला यांनी जीपीटी-५ च्या एकत्रीकरणाची घोषणा केली, तेव्हा मस्क यांनी प्रत्युत्तर दिले की, ओपनएआय मायक्रोसॉफ्टला जिवंत खाणार आहे. यावर नाडेला यांनी शांतपणे उत्तर दिले की, गेल्या ५० वर्षांपासून लोक असे प्रयत्न करत आहेत आणि हीच या क्षेत्राची मजा आहे. एआय इंडस्ट्रीत ग्रोक विरुद्ध जीपीटी असा हा संघर्ष येत्या काळात आणखी रोमांचक वळणे घेऊ शकतो.
